नारी सूचक गालियां दिन भर देते साठ।
वे भी सादर कर रहे दुर्गा जी का पाठ।।
इंदिरा सुषमा चावला, औ मेधा अस तेज।
हे ईशुर मोरे देस मा, पुन पुन उनही भेज।।
या लोपा मुद्रा गारगी , मैत्रेयी का देस।
जहां नारि कै ताड़ना, अत्याचार कलेस। ।
द्याखा मध्य प्रदेश मा, नारी का सम्मान।
अब महिला के हाथ मा, मदिरा केर दुकान। ।
राष्ट्र गान के हिदय मा, है ज्याखर अस्थान।
पुनि के चाही प्रान्त वा, आपन विंध्य महान। ।
@HEMRAJ HANS
पूरुब मा पुरान ताल फूले हें कमल जहां
अउर पच्छिम कइती जहां सदा नीरा सागरा।
उइ भैसासुर का आपन बाप बताउथें।
दुर्गा मइया कै पूजा का परल्याप बताउथें। ।
कइसा मारी के ही मती हे शारद मैय्या ज्ञान द्या
अकिल के ओछाहिल बुद्धी कै नाप बताउथें।।
गाँव नगर पूजन भजन दुर्गा जी का बास।
कहूं राम लीला शुरू कहूं कृष्ण कै रास। ।
पाबन मइहर धाम है सिद्ध शारदा पीठ।
कोउ बाहन से जा रहा कोउ आबै हीट। ।
HEMRAJ HANS
जहां बिराजीं सारदा धन्न मइहर कै भूम। भक्तन का तांता लगा नाचत गाबत झूम।।
जहाँ बिराजीं शारदा धन्न मइहर का भाग।
बंदूखै तक बन गईं नल तरङ्ग का राग।।
माता जू किरपा किहिन बइठीं आके कंठ। तब कविता गामैं लगा हेमराज अस लंठ।।
काहू का ब्याज कै चिंता ही।
काहू का प्याज कै चिंता ही।।
करजा मा बूणे किसान का
।।र्याज कै चिंता ही
मघा नखत बदरी करय धरती का खुशहाल।
महतारी के हाथ कै जइसा परसी थाल।।
ऊपर दउअय रुठि गा औ नीचे दरबार।
धरती पुत्र किसान कै को अब सुनै गोहर। ।
धन्ना सेठन के निता गर्मी बरखा जाड़।
हमही एक मउसम हबै रोटी केर जुगाड़। ।
कउड़ा के नियरे संघर अपना सेकी देह।
हम धांधर के आग का लिखी उरेह उरेह।।
फसलन मा पाला लगा परी ठंड कै मार।
भितरघात मउसम करै खेत कहै आभार।।
अपना के तेल मा खरी अस जनाथी।
या सम्बेदना मसखरी अस जनाथी।।
जे डबल रोटी का कलेबा करा थें
उनही अगाकर जरी अस जना थी। ।
नेता जी के नाव से उभरै चित्र सुभाष।
अब के नेता लगि रहें जइसा नहा मा फांस।।
बड़े अदब से बोलिये, उनखर जय जय कार।
गांव- गांव मा चल रही , गुंडन कै सरकार।।
चह जेही थुर देंय उइ ,याकी कहैं कुलांच।
नेता जी के नाव से, अयी न कऊनव आंच। ।
कोउ अमीरी से ता कोउ गरीबी से दुखी है।
कोउ दुसमन से ता कोउ करीबी से दुःखी है। ।
काहू का सुख संच हेरे नहीं मिलय
कोउ मिया से ता कोउ बीबी से दुःखी है। ।
चीता आबा देस मा सीगट भा नाराज। कहिस कि अब कइसा बनब जंगल का महराज। ।
सीगट कै ही चाहना रहै जंगली शान। बन का राजा जब रहै सीगट लोखरी श्वान। ।
जंगल मा साहुत बनी ,सीगट लोखरी केर।
देख देख बिदुरा थै ,बन का राजा शेर।।
उइ चाहा थें देस मा बाउर पइदा होंय।
औ हमरे नेरे जनाउर पइदा होंय।।
एक बूंद पानी न बरखै खेत मा
अउ धान नहीं सीधे चाउर पइदा होय। ।
