लोकतंत्र कै आतिमा

 लोकतंत्र  कै  आतिमा,  निर्बाचन   मतदान। 

बोट डार सब कोउ करी, प्रजातंत्र का मान।।  

हेमराज हंस 

आपन बूथ नजीर

 यतर करी मतदान हम, लगै अउर का ईर।

पूरे  भारत  मा   बनै, आपन   बूथ   नजीर।।

बनी नागरिक ठेठ

देस हमीं जीबन दइस, औ सुबिधा चउकेठ।  

हंस  हमूं मतदान कइ, बनी नागरिक ठेठ।।

हेमराज हंस  

ठेठ = मौलिक  

जनता ही श्री मंत

लोकतंत्र आपन हबय, दुनिआ का लकटंट।

 जनतै  लड़िअमफूस ही ,जनता ही श्री मंत।। 

हेमराज हंस 

लकटन्ट = अपने आपको विशिष्ठ  मानने वाला, गौरवशाली समझने वाला।

लड़िअमफूस= ऐसा व्यक्ति जिसकी कोई कीमत न हो। 

डारी सब जन बोट।

जनता से बिनती हिबय, डारी  सब जन बोट। 

जिव निछोह बिदुरा सकैं, लोकतंत्र के ओंठ ।।  

हेमराज हंस --मैहर 

सौ प्रतिशत मतदान

 जनता के हाथे हबइ लोकतंत्र का मान।

चला चली सब जन करी सौ प्रतिशत मतदान।।

अबस करी मतदान

 अपना से बिनती हिबै, अबस करी मतदान।

लोकतंत्र के जग्ग का , सादर राखी मान।।

चली करैं मतदान

        चली करैं मतदान
चला भैय्या मतदान केन्द्र हो  चली करैं मतदान।
अपने  बोट  दिहे  ते होई  लोकतंत्र   बलमान। ।

हम अब्बल लोकतंत्र दुनिया के मानि रहा संसार।
जनता का जनता के खातिर चला चुनी सरकार। ।
बोटहाई के दिना करी  मतदान केन्द्र प्रस्थान।
चला भैय्या मतदान केन्द्र --------------------------

कोऊ बांकी बची न अपना डारी सब जन बोट।
अपने मन के प्रत्याशी का खुदै चढ़ाई रोट। ।
बिन दबाव लालच के भाई मन का चुनी निशान।
चला भैय्या मतदान केन्द्र -------------------------------

चला करी संकल्प बंधी सब एकय  साहुत सूत।
सबसे जादा बोट डराउब अपने अपने  बूथ। ।
गांव गांव औ नगर नगर का बोलय हिन्दुस्तान।
चला भैय्या मतदान केन्द्र------------------------------------

हे मतदाता भाई बहिनी दाऊ काकी कक्का।
अरथुत के मतदान करी अपना अरगासी सबका।
अपना के मतदान मा धड़कै लोकतंत्र कै जान।
चला भैय्या मतदान केन्द्र हो  चली करैं मतदान। ।