दूगुन आमदानी का प्रमान आबा है।

दूगुन आमदानी का प्रमान आबा है। करजा मा लदा किसान आबा है।। उनखे खातिर है मूड़े के पीरा अस इनखे निता सीधा पिसान आबा है। ।।

हमरे नुकसान केर डाँड़ बांकी है।

 हमरे नुकसान केर डाँड़ बांकी है।

दुस्ट औ कृतघ्न कै दुइ फांड़ बांकी है।।

जोकर उपाय कइ सब हीच चुके हैं

फलाने कहि रहें हें की भाँड़ बांकी है। ।

हमी रूप से का मतलब,

 हमी  रूप  से का  मतलब, हम ता आंखर मा रीझे हन। 

बानी के मंत्र लिखे कागद, हम मस मा खूब पसीझे हन।।

तुम प्रेम पिआसी पिंगला ता , हम उदासीन भरथरी हयन 

तुम्ही  शुभ  होय  तुम्हार  प्रेम, हम ता आंसू मा भींजे हन।। 

हेमराज हंस 

गदहा परेसान है गइया के प्रतिष्ठा मा।।

पसीना का ठगि  के वा  बइठ हबै  भिट्ठा मा। 

कइउ  ठे लजुरी   खिआनी   है   घिट्टा  मा । । 

सेंतय   का   जरा   बरा   जाथै   कमेसुर वा 

गदहा  परेसान  है  गइया  के  प्रतिष्ठा   मा । । 

हेमराज हंस 

काहू का लिफाफा पियार है।

 काहू का पगड़ी काहू का  साफा पियार है।

काहू  का ता केबल   लिफाफा  पियार  है।।

हमही  आपन  देस  औ  पुरखा पिआर हें   

बिदेसी बिचार का उन्ही पापा पियार है।।

हेमराज हंस भेड़ा  मैहर मप्र 

अपना जेही छू देयी वा सोन बन जाथै ।

 अपना जेही छू देयी वा सोन बन जाथै । 

खारा  पानी  जम  के  नोन  बन  जाथै ।।

सौ  सौ  प्रनाम अपना के पयसुन्नी का 

असीसे से जेखे कोण  सटकोण बन जाथै।   

पबरित परसाद भंडासराध कइ रहे हें।।

जे मंदिर कै हमरे खंडित मरजाद कइ रहे हें। 

पबरित   परसाद    भंडासराध   कइ  रहे  हें।। 

उनहीं   पकड़  के  सीधे  सूली  मा  टांग  द्या 

हमरे  धरम के साथ जे अपराध   कइ  रहे  हें।। 

हेमराज हंस -भेड़ा मैहर 

ता दारू बेचत पकड़ गा दूध के लाइसेंस मा।।

 अबहूँ   कउनव   सक  है   हमरे  सेन्स   मा। 

उइ     कोरेक्स   ढो   रहे  हें   एम्बुलेंस  मा।। 

ओखे  डब्बा  कै  जब  तलासी    लीन   गै 

ता दारू बेचत पकड़ गा दूध के लाइसेंस मा।।  

हेमराज हंस 

सलेंडर परा भुसहरा मा।

 सलेंडर परा भुसहरा मा।

भोजन पकै अदहरा मा।।

तुम बिकास का बाँचा ब्याकरन

हम अटके हयन ककहरा मा। ।

हेमराज हंस

वा एक पुड़िया कुरकुरा मा रगाय गा।

वा  एक   पुड़िया   कुरकुरा   मा  रगाय  गा।

पै  रोय  के सबका   नींद   से   जगाय   गा ।।

उनही   पुटिआमै   का  अउराथै    नीक  के 

घुनघुना  धराय के अउंटा पिअय सिखाय गा।।

हेमराज हंस 

सरसुती मइय्या होय सहांई। ।

 शाबास बिटिया हार्दिक बधाई। 

सम्मान मिलै खुब बंटय मिठाई।। 

दूनव  कुल  का  नाउ    चलय  

सरसुती मइय्या होय  सहांई। । 

शीर्षक अपना अखबार के।।

 हम  देखइया   दरबार  के। 

शीर्षक अपना अखबार के।। 

गूंजय  देस  भरे मा बानी 

कबिता  के  रस  धार के ।।  

सांझ का सांझ सकार का सकार कहा।।

 गुरतुर का गुरतुर सखार का सखार कहा।

सांझ का सांझ सकार का सकार कहा।। 

 भले केत्तव  सजाबा  बनउक  बिझूका 

तोखार  न  बनी  वोही  धोखार   कहा। । 

हेमराज हंस 

प्रेम काहू से ता पैपखरी कहूं अउर ही।।

या  ता अहरी आय  बखरी  कहूं  अउर  ही। 

मन तउलय के निता तखरी कहूं अउर ही। 

अब ता  कायलिव रचाये ओंठ   बागा थी 

प्रेम  काहू से  ता  पैपखरी  कहूं  अउर  ही।। 

काहू का चीकन चांदन ता कोहू का करबर रहा।

 काहू का चीकन चांदन ता कोहू का करबर रहा।

औ काहू के भाग्ग का डाउन सब सरबर रहा।।

काहू कै सीला सपोटी बात मा मिसरी रही

काहू का भाखन हिदय छेदत रहा क्वरभर रहा।।

हेमराज हंस

उंइ मंत्र पिण्डदान से हूम तक का जाना थें।।

 दानी ता दानी उई सूम तक का जाना थें।

बड़े अंतरजामी हें बाथरूम तक का जाना थें।।

उनसे खुई कइ के 'शुंग कण्व' न बनाबा

उंइ मंत्र पिण्डदान से हूम तक का जाना थें।।

नंगदांय करय का एक ठे नंगा हेर ल्या।

 नंगदांय करय का एक ठे नंगा हेर ल्या। 

कहा  ठे लगामाय  खै   अड़ंगा हेर ल्या।। 

चला तउलबाय ल्या कउनाै  धर्मकांटा मा 

पै ओही अँहणय   खातिर पसंघा हेर ल्या । । 

हेमराज हंस

नंगदांय= विधि विरूद्ध एवं अशिष्ट व्यवहार।

अँहणा = एक बर्तन के नाप का दूसरा बर्तन,

पसंघा =असामान्य, अतुलनीय,

 हेर ल्या=  खोजिये ,तलाशिये  

अपना का बधाई अभिनंदन।

 अपना का  बधाई अभिनंदन। 

अबध    बिराजे  श्री  रधुनंदन।। 

पूर     देस   डूबा   उराव  मा

नैनन निरख्यन ऐतिहासिक छन ।।  

हेमराज हंस 

चन्द्रयान अभियान

 भारत का जब सफल भा,चन्द्रयान अभियान।

पूर बिश्व बोलैं लगा, जय भारत प्रज्ञान।।

भारत का रुतबा बढ़ा, वा पल है अनमोल।

गदगद भारत बंस है, बंदेमातरम बोल।।

जाति बाद के मथरे परंगत नहीं परै।

 जाति  बाद के मथरे  परंगत नहीं परै। 

राबन के बहकाये  मा अंगद नहीं परै।। 

चाह  जउन  जात  केर होय  धन्नासेठ 

पै गरीब के साथ वाखर पंगत नहीं परै।।

हेमराज हंस