बेंचि रहा हो ऊन

 रोजी  कै अद्धत नहीं,  बेरोजगार  का हून। 

जस जाड़े कांपत कोउ, बेंचि  रहा हो ऊन।।   

हेमराज हंस 

रात सजी जग मग जागत है।

देस स्वस्तिक अस लागत है।।

दिया लेस के कहय अमाबस

हे ! रघुनंदन जू का स्वागत है।।

हेमराज हंस भेड़ा

दरबारन मां बोलाव

बकुला मछरी खायगा , देखत रहा तलाव। 

गौरैया का होइ रहा , थाने रोज    बोलाव।। 

  

होय खूब सम्मान औ , चढ़ै रोज जल फूल

 होय खूब सम्मान औ  , चढ़ै रोज जल फूल। 

रेंड़ा तुलसी का कहै,  चिढ़ के ऊल  जलूल।। 

हेमराज हंस 

लिहे किसनमा ठाढ़ है

 लिहे किसनमा ठाढ़ है, खेते कै फ़रियाद।

बिजली घाई गोल ही, मोरे बीज कै खाद।।
हेमराज हंस

संत सताबत देख के

 संत सताबत देख के,लगी हिदय मा ठेस।

केतू नामक हराम है, जालिम बांग्ला देस।।
हेमराज हंस

जेखर उपरउझा लिहिस

 जेखर उपरउझा लिहिस, जूझा भारत देस।

वहय सनातन का बना, सबसे बड़ा कलेस।।
हेमराज हंस

जे गरीब तक से लिहिन

 जे गरीब तक से लिहिन, अपने पुरबी घूंस।

देशभक्ति के सभा मा, ओखर जबर जलूस।।
हेमराज हंस

जे कबहूं घोरिस नहीं

 जे  कबहूं  घोरिस नहीं, पानी माही हींग।

भा निनार ता जम गयीं, ओखे मूड़े सींग।। 

नल कुबेर के हिदय मा,

 नल  कुबेर  के हिदय  मा, काहे उचय  न  टीस। 

वा एक तो बड़मंसी  लिहिस, औ मागै बकसीस।। 

भला बताई आप से, कउन ही आपन सउंज।
अपना बोतल का पियी, हम पी पानी अउंज।।

छोहगइली लये चांदनी

 छोहगइली लये चांदनी, जागी सगली रात। 

नदी तीर गोठत  रहा, चन्दा रोहणी साथ  । । 

जब से पोखरी ताल का, होइगा पानी थीर। 

ता चकबा निरखैं  लगा, चंदा  कै  तसबीर।।  

प्रेम भरी पोखरी रही,

 प्रेम भरी पोखरी रही, कोउ दिहिस घघोय। 

जस बिजली के तार का, जम्फर टूटा होय।। 

हेमराज हंस  

पहिले लड़ीं गिलास खुब

पहिले लड़ीं गिलास खुब, नेम प्रेम सम भाव। 

फेर गारी गुझुआ  भयीं, होय  लाग जुतहाव।। 

हेमराज हंस 

बांध फूट पुलिया बही

बांध फूट पुलिया बही गिरी कहूं स्कूल।

दरबारी कहि रहें हें यमै दइव कै भूल।। 

संकट मा भारत दइस

संकट मा भारत दइस, सरना गत का टेक। 

चाह दलाईलामा  हों, याकि   हसीना  सेख।। 

मउसम केर बिभाग।

 हमरे भारत मा हबै, मउसम केर बिभाग।  

होय  देबारी देस मा, ता वा बताबय फाग।। 

लिपटिस पीपर से कहिस

लिपटिस पीपर से कहिस, है उपयोग हमार। 

पै  भारत मा  हर  जघा,  पूजा  होय   तुम्हार।। 

पीपर बोला  सुन सखा,  हम  भारत   के बीज।

हम हन मंदिर अस हिया, औ तुम जस टाकीज।। 

हेमराज हंस  

लेत रहें जे थान के, लम्बाई कै नाप।

 लेत  रहें  जे थान  के,  लम्बाई  कै नाप।

अर्ज देख लोटय लगा,उनखे छाती सांप।।

भला बताई आप से, कउन ही आपन सउंज।

अपना बोतल का पियी, हम पी पानी अउंज।।

न मात्रा का ज्ञान है, न हम जानी वर्ण।

 न मात्रा  का  ज्ञान  है, न हम  जानी वर्ण। 

पारस के छुइ दये से, लोहा होइगा स्वर्ण।। 

मानो मोहनिया घाट

 तुम रहत्या जब साथ ता , पता चलय न बाट। 

औ रस्ता छोह्गर लगै, मानो मोहनिया घाट।। 

हेमराज हंस 

चिटका फोरत चली गय

 चिलचिलात या घाम मा, मिली कहूं न छाह।

चिटका फोरत चली गय, एक पिआसी डाह।।