राजमार्ग मा चल रहें ,

 राजमार्ग   मा  चल  रहें ,  बड़े  बेढंगे   यान। 

चालक काही है नहीं, अपर डिपर का ज्ञान।। 

हेमराज हंस  

तब से बिपक्ष कै बड़मंसी चली गै।।

 खाता बचा है करंसी चली गै।

मछरी के लोभ मा बंसी चली गै।।

जब से मरे हें जेपी औ लोहिया देस मा

तब से बिपक्ष कै बड़मंसी चली गै।।

*लोकगीत *

  दार महँगी  है  खा ल्या सजन  सुसका। दार महँगी  ।   

भाव   सुनत  मा लागय गरे   ठुसका।। दार महँगी  ।। 

  

किधनव  बनाउब  पानी  पातर। 

एक दुइ दिन का दइ के आंतर।। 

लड़िकन के मुंह दइ के मुसका। दार   महँगी । 

दार महँगी है खा ल्या बलम सुसका। दार महँगी ।।

   

गुजर करब खा लपटा मीजा।

दार  बनी  जब अइहैं  जीजा।। 

करंय का मजूरी कहूं खसका। ।  दार महँगी।    

दार महँगी है खा ल्या बलम सुसका। दार महँगी ।।

कइसा  चलय  अटाला  घर का। 

अइसा   पाली  पोसी  लरिका  ।।

जइसा सीता मइया लउकुस का।   दार  महँगी।

दार महँगी है खा ल्या बलम सुसका। दार महँगी ।।

✍️हेमराज हंस भेड़ा मैहर 

चाहे कोऊ कवि लिखय, चह शायर श्रीमान

 चाहे  कोऊ  कवि  लिखय,  चह  शायर  श्रीमान। 

सब्द सक्ति जब तक नहीं, तब तक नही  प्रमान।।  

अहिबाती का बिधबा पेंसन,

 अपरोजिक  के  भरे पेट, औ  उनहिन  निता  सुपास   हबै।  

औ  जेही   अगरासन  निकरै,  वा  निरजला  उपास   हबै।। 

अहिबाती   का  बिधबा पेंसन,   बाँटय कै योजना  अइ अबै  

काजर आंज के कहिस फलनिया देस का बड़ा बिकास हबै।। 

हेमराज हंस

बाप के फोटो मा थूँकी।

 हमरेन पुरखन का गरिआई, अउर  भरी हमिन हूंकी। 

हम नहि येतू प्रगतिशील , कि बाप के फोटो मा थूँकी।। 

नित परभाती  औ  सँझबाती, करत  देस  का  पूजीथे

द्रश्टिदोख  मा उदवबत्ती  अपना  का  लागय  लूकी।।

हम गंगा कबेरी के पुजइया, रोज नहात मा सुमिरी थे 

हमीं बिदेसी कहिके अपना, नाहक मा  जबान  चूकी ।।

जे हमरे इष्ट तिथ तेउहारन मा घिनहे राखय  भाव सदा 

हम ओहू  का आदर देई थे, की चली अपना शंख फूंकी।।

जेखर  उजरइती एकअंगी, कल्थी कल्थी लागथी हंस 

उइ भंडारा का जानैं  जे पाइन बिचार कउरी टूकी।।

हेमराज हंस   

वहै है शक के घेरे मा

वहै है शक  के  घेरे  मा, जे  नेम   प्रेम   का  आदी   है। 

जे  घर  फूंक  तमासा देखय, वा  कबीर  का गादी   है।। 

 

उनही फिकर ही युबा बर्ग कै, एहिन से सब सुबिधा ही  

कोउ अमलासन रहय  न पाबै  नशा से गाड़ी  लादी है।।  

निकरी  भूंख जब अलगा  मारे उड़ी उड़न्की खोरन मा

कोउ  उसाँसी  नहीं  देबइया  अपजस केर मुनादी  है।। 

 

अनचिन्हार  तक से जे राखय  बड़ा अपनपौ अंतस से   

कहिस  अमाबस  चंदा  काही  बहुतै  जाती  बादी है।।   

चाहे कहय  अनूतर  कोऊ  चाह कुलांच अगाध  कहै 

हंस  देस के संबिधान मा बोलय केर  आजादी   है। ।

हेमराज हंस  

अपना का आशीष

 जेखे  मूड़े मा रहय,  अपना का आशीष  ।

वा बन जाय कनेर से , गमकत सुमन शिरीष।  । 

लगथै उनखर उतरिगा जादू।

 लगथै  उनखर उतरिगा  जादू।

हेरा  आन  गुनिया  अब   दादू।।

कब तक सूख   पेड़ का द्याहा  

पुन  पुन पानी  पुन  पुन खादू।।

बजरंगी का  कब तक छलिहै

कालनेम   बनि   ज्ञानी  साधू ।।

एक न मानिस हिरना कश्यप

खुब  समझा के हार कयाधू।।

हेन  जन  जन के  कंठहार हें 

ओछी  जात  के आल्हा  धांधू।। 

✍️हेमराज हंस ✍️

KAVI SAMMELAN REWA

सिरि शम्भू काकू के पुन्न दिबस मा, हमहूं पहुंच गयन  रीमा। 

जिउ भर कबिता  सुन्यन सुनायन बड़ संतोष मिला जी मा। ।

श्री निष्ठुर जी ,कक्का जी , औ  सरस, भ्रमर, जी शांति दूत।

श्री शिवानंद,  श्री सूर्यमणी , शिवपाल, कमल जी  बानी पूत। ।

कैलाश  तिवारी ,औ  धीरेन्द्र  ,सीमा रानी,   क्रांति बइया । 

अबध बिहारी, राजकरण , अउ राम सुशील ,मणी भइया।। 

अरुणा पाठक ,स्नेहा जी, आरती जी  ,  हसमत रीबानी।

हेमराज   भेंड़ा   बाले,   यश   पी   तीवारी    कै    बानी। ।

 

अध्यक्ष प्रभाकर चौबे जी ,श्री परिहार बिशिष्ट अतिथी । 

जे भूले बिसरें छमा करैं ,  संपन्न  काकू  कै  पुन्न  तिथी।। 

काकू जी का सुमिरन कइ के, हम  पंचे सब धन्न भयन। 

कवि सम्मेलन  संपन्न हंस  ,सब  अपने अपने घरे गयन। 

हेमराज हंस----15/05/2024