गरीब केर ठंडी

                         गरीब केर ठंडी

 गरीब केर ठंडी          गरीब केर ठंडी। 

बांध्य का देहे गतिया पहिरै   का फटही बंडी। । 

सथरी बिछी ता लागय डनलप का गुलगुल गद्दा। 

पउढ़य घरे भरे  के भाई बहिन अउ दद्दा। । 

आबा थी निकही निदिआ बे गोली बे बरंडी। 

दिन उअतै घाम तापै चउरा मा मारे पलथी। 

बिटिआ लाग रांधै नए चाउर कै गोलहती। । 

चुल्हबा  मा आंच देथी धंधोल बिनिआ कंडी। 

दुई होय कि रुई होय कहि के मुस्की मारै भउजी। 

कापा थें तन के हाड़ा जाड़ा किहे मन मउजी। । 

तउअव गरीबी खुश ही जस जुद्ध  मा शिखंडी। 

करजा का खाब है अउ पयार  केर तापब। 

ओन्हा  नहीं अलबुद्दा जाड़े मा थरथर काँपब। । 

गरीबी कै नामूजी जाड़ा करइ  घमण्डी। । 

                     

                   HEMRAJ HANS BHEDA

टोरिया कहा है

बारजा बचा है ओरिआ कहाँ ही। 

पिल्वांदा के दूध कै खोरिआ कहाँ ही।। 

राशन कार्ड हलाबत तिजिया चली गै

कोटा बाली चीनी कै बोरिआ कहाँ ही।। 

आजादी के अश्व मेध कै भभूत बची ही

गांधी के लोकतंत्र कै अजोरिआ  कहाँ ही।। 

वा प्रदूषण कै पनही पहिरे मुड़हर मा चला गा

घर गाँव  के अदब कै  ओसरिआ कहाँ ही।। 

नोकरी लगबामैं का कहि के लइ  गया तै

वा गरीब कै बड़मंसी टोरिआ कहाँ ही।। 

सार अबाही खूंटा ग्यरमा औ अम्मा का पहिलय सुर 

कामधेनु कै पामर वा कलोरिआ कहाँ ही।। 

घर के सुख संच कै जे जपत रहें माला 

वा पिता जी कै लाल लाल झोरिआ कहाँ ही।।                
 ✍️ हेमराज हंस भेड़ा मैहर 

दोहा

कबहूं कुरुअन मा नप्यन कबहूं नप्यन कुरइ।

बासमती उनखे निता हमरे निता कोदइ।।

कविता

मतदान

जनता के हाथे हबय लोकतंत्र का मान। 

चला चली सब जन करी सौ प्रतिशत मतदान।। 

🌻🌻🌻🌻🌻🌻

रहा गरीबन से सदा बोटन का बेउहार। 

दूबर का एकादशी मोटन का तेउहार।। 

🌻🌻🌻🌻🌻🌻

अबै गरीबन के लगी टप टप अंसुअन धार। 

अइसा मा कइसा लिखी पायल कै झंकार ।।

🌻🌻🌻🌻🤗

कत्ती घिनही लग रही राजनीति कै चाल।

कबौ उखाड़ै बार वा कबौं उधेरै खाल।। 

फलनिया

जबसे तोहका दिख्यन फलनिया भाजी खोटत खेत मा। 

तब से धकपक करय करेजबा औ मन नहि आय चेत मा।। 

महकैं लाग मेड़ पगडंडी गुलमेंहदी औ रेउजा।

चंचल मन का धौं काहे य हिदय लेय उपरउझा।।

रामौ सत्त कही हम तोहसे खोट न कउनौ नेत मा। 

पहिल दउगरा के भुंइ घांई गमकै उनखर देह। 

उपरंगी उंई पीसैं दांत पै भितर गुल्ल है नेह।। 

मारे लाज के लाल गाल जस पहिलय चुम्मा लेत मा। 

वा गसान कै मेड़ फलनिया लागै बड़ी उरायल।

बइर  खात मा जहा गिरी तै छमछम बाजत पायल।। 

सामर मुंहिआ अइसा लागै जइसा धान गलेथ मा। 

बोली लगय तोहार फलनिया लोकगीत अस मीठ। 

सहजभोर छोहगर य रूप मा लग न जाय कहुं डींठ।।

बड़ी पिआर लगा तू हमका हमरै ओरहन देत मा। 

जब से तोहका दिख्यन फलनिया भाजी खोटत खेत मा।। 

अबहूं नही व बिसरै घटबा दउरी धोमन चाउर।।

अउ  मूडे़ का जूड़ा लागै जइसा खेत मा छाहुर।।।

घटै बढ़ै धड़कन का रकबा तापमान जस रेत मा। 

जब से तोहका दिख्यन फलनिया भाजी खोटत खेत मा।। 

लगै गाल का तिला फलनिया जइसा होय डिठउरा।

पै चम्पा के फूल के नियरे हिरकै कबौं न भउरा।।

काहू के नैनन का दोहपन लग न जाय कहुं सेंत मा। 

जब से तोहका दिख्यन फलनिया भाजी खोटत खेत मा।। 

🌻🌻🌻🌻@हेमराज हंस भेड़ा मैहर 

धरा रह गया ज्ञान

लेखन जब करने लगा कागद लहूलुहान।

ब्रह्म शब्द तक रो पड़ा धरा रह गया ज्ञान।।

बाल दिबस

पन्नी बीनत बीत गै ज्याखर उमिर किसोर। 

ओखे दुअरै कब अइ बाल दिबस कै भोर।। 

🌻🌻🌻🌻🌻🌻🌻🌻🌻🌻🌻

जे कबहूं जानिस नही पोथी अउर सलेंट। 

बूटन मा पालिस किहिस होटल घसिस पलेट।। 

🌻🌻🌻🌻🌻🌻🌻🌻🌻🌻🌻🌻

हिंआ ब्यबस्था खाय गै पंजीरी औ खीर। 

गभुआरन के भाग मा बदी कुपोसित पीर।। 

🌻🌻🌻🌻🌻🌻🌻🌻🌻🌻🌻🌻

दरबारी जेही कहै बोटहाई मा नात। 

पै कबहूं देखिन नही वाखर दुधिया दांत।। 

🌻🌻🌻🌻🌻🌻🌻🌻🌻🌻🌻🌻

हबैकुपोसित देस मा जेखर ल्यादा घींच। 

ओ! बालदिबस फुरसत मिलै ता उनहूं का सींच।। 

अयोध्या

राजनीति जेहि रही घंघोई। रामा हो रामा 

ओही थीर कइ  दिहिन गंगोई।। रामा हो रामा 

 सांपौ मरिगा टूट न लाठी। 

पै कुछ जन कूदैं जस आंटी।। 

छूटि गै सांड़न कै चलौना। रामा हो रामा 

ओही दिहा न वोट

बिना धनीधोरी का है हेन निरधन अउर गरीब। चाहे ज्याखर राज होय पै बदला नही नसीब।। झउआ  भर चलि रहीं योजना पै ओखे कउन लेखा मा। 

गरीबन का है नाव नही पबित्र गरीबी रेखा मा।। 

चह जउन  जात हो गरीब पै सब कै समिस्या एक ही। 

सबके आँसू अंतस पीरा केर तपिस्या एक ही।। 

राजनीत सब दिन चाटिस ही पूंजीपति के तरबा। 

औ गरीब के घर का लाइस अपनेन 🏡 का क्वरबा।। 

राजनीत का लखा कपट छल की ही केत्ती सूध। 

हमरे घर मा दारू बांट्य अपने घर मा दूध।। 

पी पी दूध भै राजनीत  य द्याखा केत्ती मोट।  

हंस कहैं जे दारू बांट्य ओही दिहा न बोट।। 

             हेमराज हंस भेड़ा