तुम बत्तीसी काढ़ दिहा औ खीस निपोरे चले गया।
गील पिसान हमार देख परथन का बटोरे चले गया।।
सिसकत राति से पूछि लिहा कस लाग पलेबा खेते मा
तुम बिदुरात साँझ देखय का बड़े अँजोरे चले गया।।
गाय बिआन ता बनी पेंउसरी पै पेटपोछना नहीं रहा
पूरा दिन महतारी रोयी तुम बिन मुँह फोरे चले गया।।
जब से रोमा झारिस नफरत प्रेम का रकबा घटा खूब
खसरा माही दर्ज खैरिअत झूंटय झोरे चले गया।।
काल्ह फलनिया कहत रही या सरबार मा गाज गिरै
कउनव साध न पूर भयीं , बस गउखर जोरे चले गया।।
चित्रकूट मा दीपदान का खासा जबर जलसा भा हंस
पै तोहार नजर गदहा हेरैं ता उनखे ओरे चले गया।।
हेमराज हंस -भेड़ा मइहर
