इंदिरा गाँधी

जे बदल दइस भुंगोल, नमन वा इंदिरा गाँधी  का। 

इतिहास के पल  अनमोल ,नमन वा इंदिरा गाँधी का।।  

बान्नाबे हजार पकिस्तानिन से , कनबुड्ढ़ी  लगबाइन 

जे कबौ न खाइन  झोल , नमन वा इंदिरा गाँधी का। ।  

भारत रतन पटेल

आजादी  के दिआ मा,  भरिन  जे  बाती तेल। 

देस  करै  सत  सत नमन ,भारत रतन पटेल।। 

 

पांच सै बांसठ राज मा, अइसा कसिन लगाम। 

सब उनखे  ललकार से ,लिहिन तिरंगा थाम। ।

 

 सिरि  सरदार पटेल कै , सूझ बूझ औ ढंग।

 देख के साहस बीरता ,दुनिया रहि गय दंग।

 

गुरिआ गुरिआ गुहि दिहिन ,देस का साहुत सूत। 

जय  बल्लभ  'सरदार'  जी,  भारत   रतन  सपूत। ।

 

हम भारत बासी करी ,शत शत नमन अभार। 

जब  तक चंदा  सुरिज हें,  नाव चली सरदार।  । 

 

भोले का कैलास

 ओतुन परबस्ती करा , जेतू कूबत पास। 

परोपकार मा चला गा ,भोले का कैलास।। 

आचार्य रामसखा नामदेव जी

 हमारी ग्राम गिरा रिमही बघेली के "दुष्यंत" आचार्य रामसखा नामदेव जी को "विश्वनाथ सिंह जूदेव स्मृति पुरस्कार" मिलने पर हार्दिक अभिनंदन सादर बधाई। मै व्यक्तिगत रूप से मैं दादा नामदेव जी के लेखन से प्रभावित हूँ। और उनका प्रशंसक हूँ। उनके विवाद और एजेंडा रहित काव्य शैली का मै कायल हूँ। वे बघेली के उन विरले साहित्यकारों में हैं, जो केवल समाज के लिए लिखते हैं,किसी को खुश करने के लिये नहीं। वे किसी सड़ांध बदबूदार विचारधरा के पोषक और पिछलग्गू नहीं हैं।उनके साहित्य में सामाजिक सरोकार , लोक संस्कृति और अपनी माटी की सोंधी सुगंध है। विंध्य और बघेली को ऐसे महान सपूत पर गर्व है। कोटि कोटि बधाई.

नंगई से नहीं

नंगई      से      नहीं          बड़प्पन     से         नापा।

फेर   तुहूं   अपने    सीना    का   छप्पन  से     नापा।।

य  देस    देखे  बइठ   है राजा  नहुष  के  अच्छे   दिन  पै ,

वाखर मतलब या नहीं तुम बाल्मीक का बिरप्पन से नापा। ।  

                 @ हेमराज हंस -भेड़ा मैहर 

 

 

 

बिक्ख उइ देथें

बिक्ख उइ देथें महिपर मा घोर के। 

औ रहपट जड़ रहे हें हाथ जोर के। । 

हंस 

अब ता सगले पुन्न धरें अपना के हीसा मा।

 अब ता  सगले  पुन्न  धरें अपना  के   हीसा  मा। 

तउ   लजाते  हया   देख   मुँह  आपन   सीसा मा। ।

 

को   फुर  कहै  बताबै   भाई   देस  के   जनता से 

जबकी  हेन उइ हेमै  बितुते   सत्ता के चालीसा मा। । 

 

उइ  पाखण्डी देस के सूरज काही जुगनू लिख दीन्हिन 

लबरी   पोदी  बाला  वा इतिहास  है  हमरे  हीसा मा। । 

 

सिये सिये अस ओंठ हे भइय्या अमरित परब आजादी के 

लागै  जइसा  आंखर- आंखर  बंद हो  बपुरे  मीसा मा। । 

 

सागर  कै अउकात   नहीं पै   नरबा  खुब अभुआय लगे 

हंस  कहा  थें उइ   अगस्त का  बंद है  हमरे  खीसा मा। ।   

                         हेमराज हंस भेड़ा मइहर  

गाँधी जी अमर हें

अब  अउर  येसे  केतू निकहा सीन चाही। 

उनखर धड़कन नापै का नई मशीन चाही।। 

चश्मा  के  मथरे  अब   काम   न    चली   

उनखर चरित्त द्याखैं  का अब दूरबीन चाही। । 

*********************************

 गाँधी  जी  अमर  हें गंगा  के धारा अस। 

देस के माटी  मा जन जन के नारा अस। ।  

गाँधी जी पढ़ाये जइहै सब दिन इस्कूल मा 

भारत के बचपन का गिनती औ पहारा अस। । 

*******************************

हम   दयन    नये   साल  कै   बधाई।  

फलाने कहिन तोहइ लाज नहीं आई। ।

कुटिया के खुटिया का कलेण्डर बदला है 

पै अबहूँ   धरी   ही    टुटही   चारपाई। ।   

**********************************

कोऊ अमीरी से ता कोउ गरीबी से दुःखी है। 

कोउ दुसमन से ता कोउ करीबी से दुःखी है। । 

या   दुनिया   मा   सुख   संच  हे रे नहीं  मिलै  

कोउ मियाँ  से ता  कोउ  बीबी  से  दुःखी  है। ।     

***************************************

वा भले जीभ दार है पै मकुना मउना है। 

एहिन से ओखे हीसा मा अउना पउना  है। । 

पड़बा है काहे दूबर य बात दिल्ली जाना थी 

दुधारू लोकतंत्र के पडउना  का थम्हाउना है। । 

**************************************    

नास्तिक का पुरानिक बताऊ थें

उइ बात बड़ी ठोस औ प्रमानिक बताऊ  थें। 

सामाजिक   जहर   का   टानिक   बताऊ थें।। 

जब  जब   राजनीत   का   हांका   परा   थै   

ता फलाने   नास्तिक का  पुरानिक बताऊ थें। । 

*******************************

काहू का पिसान से ता काहू का चोकर से चला थै। 

काहू का एक्का से ता काहू  का जोकर से चला थै।।   

वा  महतारी  के  हाथ  कै  रोटी  भला  का जानै 

ज्याखर    रसोई    घर  नोकर    से    चला    थै। ।  

हिन्दी पढ़ डाक्दरी रही

 हिन्दी डाक्दरी पढ़ रही,गदगद मध्यप्रदेस।
पै अंगरेजी  से  लड़ै , हाई कोट  मा  केस।।

चांदी  कै चम्मच करै , पतरी केर दुलार। 

या बरबस्ती देख के , दोनिआ परी उलार।।