कबहूँ कुरुआ मा नपयन ,कबहूँ नपयन कुरई।
बासमती उनखे निता, हमरे निता कोदई। ।
*******************************
हाँ हजूर हमहूं हयन , फाँसी के हकदार।
हमसे कहबररै नहीं , रिक्शा काहीं कार। ।
*******************************
मघा नखत बदरी करय धरती का खुशहाल।
महतारी के हाथ कै जइसा परसी थाल।।
***********************************
नीचन मा सत्सङ्ग का , एकव नहीं प्रभाव।
जस घिनहाई मा रमै , कुकूर सुमर सुभाव।।
*********************************
राजनीत औ मीडिआ ,दुनहु का दिल फ्यूज।
इनही चाही बोट औ ,उनही ब्रेकिंग न्यूज़। ।
********************************
अंतस मा पीरा करै, अपनेन का बेउहार।
लंका जीते राम जू , औ गें अबध मा हार। ।
*******************************
चोरन का चोट्टा दिखय ,औ शाहन का शाह।
पै झरहन कै रात दिन ,सुलगै छाती डाह। ।
*******************************
