जिधना जमुना जी किहिन, यम के तिलक लिलार।
भाई बहिन के प्रेम कै , बन गय दुइज लोलर। ।
************************************
हयी हमारे देस मा , बहिनी बिटिआ पूज।
भाई बहिन के प्रेम का ,पाबन भाई दूज। ।
*************************************
ईसुर से बिनती करी , यहै लालसा मोर।
अपना का जीबन रहै , जगमग सदा अजोर। ।
*************************************
जुगनू जब खेलिस जुआं , लगी जोधइया दाव।
पुनमासी पकड़ै लगी , अधिआरे के पाँव। ।
*************************************
हमरे तिथ तिउहार मा , जब से चढ़ा बजार।
हम बांसुरी का भूल के , किहन बरूद से प्यार। ।
***************************************
चारिव कइती लगी है ,मोरे देस मा जोंक।
जे नहि चूसै पा रहा , वहै रहा है भोंक । ।
