कब्ज़ा कीन्हे चीन।।

 बाल दिबस कै हार्दिक सुभकामना 

============================

हमही ता  अइसा लगै, बाल दिबस का सीन। 

जस  हमरे  कैलाश मा, कब्ज़ा  कीन्हे  चीन।।  

***************************

पन्नी बीनत बीत गै, ज्याखर उमिर किसोर। 

ओखे दुअरै कब अइ बाल दिबस कै भोर।। 

🌻🌻🌻🌻🌻🌻🌻🌻

जे कबहूं  जानिस  नही,  पोथी  अउर   सलेंट। 

बूटन मा पालिस किहिस होटल घसिस पलेट।। 

🌻🌻🌻🌻🌻🌻🌻🌻🌻

जहाँ  ब्यबस्था  खाय गै, पंजीरी  औ खीर। 

गभुआरन के भाग मा बदी कुपोसित पीर।। 

🌻🌻🌻🌻🌻🌻🌻🌻🌻🌻

दरबारी   जेही  कहै, बोटहाई   मा  नात। 

पै कबहूं देखिन नही वाखर दुधिया दांत।। 

🌻🌻🌻🌻🌻🌻🌻🌻🌻

हबै   कुपोसित  देस   मा, जेखर  ल्यादा    घींच। 

ओ! बालदिबस फुरसत मिलै ता उनहूं का सींच।। 

******************************

हेमराज हंस -- भेड़ा मैहर 

काल्ह कउआ बताबत रहा सुआ से।

 काल्ह कउआ बताबत रहा सुआ से।

ओही मोतिआ बिन्द होइगा जग्ग के धुंआ से।।

जयन्त भले बड़े बाप केर बेटबा आय

ओहू कै आँख फुटि गै कुदृष्टि खुआ से।।

उनखे मन मा ही खराबी की तन ख़राब है

खजुरी उच रही ही मखमल के रुआ से ।।

सिंघासन के पेरुआ सब दिन भयभीत रहे हें

कबौं सामना नहीं किहिन खुल के गेरुआ से।।

कहि द्या खबीस से कि वा उछिन्न ना करय

हंस कै रण चण्डी टोर देयी नेरुआ से ।।

हेमराज हंस - भेदा मैहर

अपना चिन्ह प्रतीक।।

 माँ  शारद  से  बिनय  है, हरबी  होई नीक। 

मइहर के साहित्य कै, अपना चिन्ह प्रतीक।।   

गदहा परेसान है गइया के प्रतिष्ठा मा।।

पसीना का ठगि  के वा  बइठ हबै  भिट्ठा मा। 

कइउ  ठे लजुरी   खिआनी   है   घिट्टा  मा । । 

सेंतय   का   जरा   बरा   जाथै   कमेसुर वा 

गदहा  परेसान  है  गइया  के  प्रतिष्ठा   मा । । 

हेमराज हंस 

बाबू जी।

                   बाबू जी 

===============================

बड़ी मुसीबत झेल के हमही, पालिन पोसिन बाबू जी। 

लदी गरीबी से  गाड़ी  का, बल  भर  ढ़ोसिन  बाबू जी।।

मन तक गहन धरिन बेउहार के हम पंचेन के पढ़ाई मा 

पै न तन मा रही  सिरिहिरी , कबौ ना  घोसिन बाबू जी।।

बब्बा जी  के गुजरे  माही,   भींज  रहीं   दोउ  आँखी

तउ फुआ का धीर बंधाबत अँसुआ पोछिन  बाबू जी।।

बड़की नातिन के काजे मा, ओइन  कन्या दान किहिन 

बिन अम्मा के पीर हिदय मा खूब समोखिन बाबू जी।।

हिबै  बरा अस जिनखर छांही  हर शाखा से निकरी जर 

राम  चरित  मानस  चउपाई, प्रेम से घोखिन  बाबू जी।।

एक  ईमान दार  पिता   कै  संतान   होब   है  हंस  गर्व 

कबाै  न काहू का गर मुधिआइन औ मुसोसिन  बाबू जी।।

हेमराज हंस भेड़ा मैहर -9575287490 

काहू का लिफाफा पियार है।

 काहू का पगड़ी काहू का  साफा पियार है।

काहू  का ता केबल   लिफाफा  पियार  है।।

हमही  आपन  देस  औ  पुरखा पिआर हें   

बिदेसी बिचार का उन्ही पापा पियार है।।

हेमराज हंस भेड़ा  मैहर मप्र 

तुम बत्तीसी काढ़ दिहा औ खीस निपोरे चले गया।

 तुम बत्तीसी  काढ़  दिहा औ खीस निपोरे चले गया। 

गील पिसान हमार देख परथन का बटोरे चले गया।। 

सिसकत राति से पूछि लिहा कस लाग पलेबा खेते मा 

तुम बिदुरात साँझ देखय का बड़े अँजोरे चले गया।। 

 गाय बिआन ता बनी पेंउसरी  पै पेटपोछना  नहीं  रहा 

पूरा दिन महतारी रोयी  तुम बिन मुँह फोरे चले गया।। 

जब से रोमा झारिस नफरत प्रेम का रकबा घटा खूब 

खसरा  माही  दर्ज  खैरिअत  झूंटय  झोरे चले गया।। 

काल्ह  फलनिया  कहत  रही या सरबार मा  गाज गिरै 

कउनव  साध न पूर भयीं , बस गउखर जोरे चले गया।।

चित्रकूट मा दीपदान का खासा जबर  जलसा भा हंस 

पै तोहार नजर  गदहा  हेरैं  ता उनखे  ओरे चले  गया।। 

हेमराज हंस -भेड़ा मइहर 

अपना जेही छू देयी वा सोन बन जाथै ।

 अपना जेही छू देयी वा सोन बन जाथै । 

खारा  पानी  जम  के  नोन  बन  जाथै ।।

सौ  सौ  प्रनाम अपना के पयसुन्नी का 

असीसे से जेखे कोण  सटकोण बन जाथै।   

रात सजी जग मग जागत है।

 रात  सजी  जग मग  जागत है। 

देस  स्वस्तिक  अस   लागत है।। 

दिया  लेस के  कहय  अमाबस 

हे ! रघुनंदन  जू का स्वागत है। । 

हेमराज हंस  भेड़ा  

नल कुबेर के हिदय मा,

 नल  कुबेर  के हिदय  मा, काहे उचय  न  टीस। 

वा एक तो बड़मंसी  लिहिस, औ मागै बकसीस।। 

भला बताई आप से, कउन ही आपन सउंज।
अपना बोतल का पियी, हम पी पानी अउंज।।