बनी नागरिक ठेठ

देस हमीं जीबन दइस, औ सुबिधा चउकेठ।  

हंस  हमूं मतदान कइ, बनी नागरिक ठेठ।।

हेमराज हंस  

ठेठ = मौलिक  

टोरिहै राम पिनाक

 भले लगा लें जोर सब, उनही दई तिलाक। 

करके चूर घमंड का, टोरिहै राम पिनाक।। 

हेमराज हंस  

जनता ही श्री मंत

लोकतंत्र आपन हबय, दुनिआ का लकटंट।

 जनतै  लड़िअमफूस ही ,जनता ही श्री मंत।। 

हेमराज हंस 

लकटन्ट = अपने आपको विशिष्ठ  मानने वाला, गौरवशाली समझने वाला।

लड़िअमफूस= ऐसा व्यक्ति जिसकी कोई कीमत न हो। 

डारी सब जन बोट।

जनता से बिनती हिबय, डारी  सब जन बोट। 

जिव निछोह बिदुरा सकैं, लोकतंत्र के ओंठ ।।  

हेमराज हंस --मैहर 

नंगदांय करय का एक ठे नंगा हेर ल्या।

 नंगदांय करय का एक ठे नंगा हेर ल्या। 

कहा  ठे लगामाय  खै   अड़ंगा हेर ल्या।। 

चला तउलबाय ल्या कउनाै  धर्मकांटा मा 

पै ओही अँहणय   खातिर पसंघा हेर ल्या । । 

हेमराज हंस

नंगदांय= विधि विरूद्ध एवं अशिष्ट व्यवहार।

अँहणा = एक बर्तन के नाप का दूसरा बर्तन,

पसंघा =असामान्य, अतुलनीय,

 हेर ल्या=  खोजिये ,तलाशिये  

उनहिन का पट्टा बना है। BAGHELI KAVITA

हर जांघा   उनहिन  का   पट्टा बना है। 

औ   हमरे  खातिर    सिंगट्टा  बना है।। 

कुआं के पाट मा जाके देख्या तू कबहूँ

पाथर   मा   रसरी   का  घट्टा  बना है।।

 

उनहिन के खातिर ही रेशम अउ मलमल 

हमरे  निता  केबल  लठ्ठा   बना    है। । 

उइ चाह भले दिन भर टपकाये लार बागैं  

वा गोमा बना  लइस  ता हले चठ्ठा बना है।।  

कबहूं ता हमरिव समय बहुरी निकहा 

लगाये  अड़ाउसा  या  पट्ठा  बना  है। । 

अनर्गल करैं का उइ टोकिन ही जब से 

तबहिन   से    संबंध   खट्टा   बना   है।।   

पीरा  का  अपने  गुहे  'हंस'  बइठ  हें 

भितर गुल्ल धंधकत एक भट्ठा बना है।। 

हेमराज हंस  

  

 

हमरे खलीसा मा पइसा नहीं रहा।

हमरे खलीसा मा पइसा नहीं रहा।

येसे आदर अपना के जइसा नहीं रहा।।

बब्बा हें चउआन चकाचउध देख के

कहिन कि समय फूहर अइसा नहीं रहा।।

क्वामर कलाई गोरी कै तउ चूरी चटकिगै

हमरे जनम दिन का सतइसा नहीं रहा।।

फलानिया तारा दइके मइके चली गै

जबकी हमार कउनव खोड़इसा नहीं रहा। ।

लाजा ढीठी राम रामउहल ता होथी

पै हंस का ठिकाना रहइसा नहीं रहा। ।

हेमराज हंस

भीड़ टंटपालिन कै पोस्टर तमीच का

भीड़  टंटपालिन  कै पोस्टर तमीच का । 

छहेला का सराही की सराही बीज का। । 

अरे !  कूकूर   भले   वफादार   हो  थै 

पै ओहू के जक्शन लगा थै रेबीज़ का। । 

हेमराज हंस  

दिहा काहे खुरखुन्द।

कागा से कोयल कहिस,  दिहा काहे खुरखुन्द। 

तोहरव  प्रिय बोली लगी,  बन जा काग भुसुंड।। 

जब  मतलब  पूछय  लगें, रामराज्ज का मित्र। 

हम निकार के धइ दिहन,अबधपुरी का चित्र।।

या जउन हमी तकमा मिला है। कवि होय के शक मा मिला है।।

या  जउन  हमी   तकमा  मिला है। 

सभ्भ   होय  के  शक मा  मिला है।।

 

होरी   के  फगुहार   बताउथें   कि 

या  बम   चका  चक मा  मिला  है। । 

 कोउ  ता  अजल्याम   बताउत  थै 

कोउ  कहा  थै  हक  मा  मिला है। । 

उइ  रोज सकारे मंदिर मा मिला थें 

जब से मालदार मोहकमा मिला है।। 

अब प्याज बोये मा  अफीम जमा थी 

बीज राजनीत  के चकमा मा मिला है। ।

 

 वा हंस गा तै रोजी रोटी के तलाश मा 

जेखर आधार काड काल्ह ट्रक मा  मिला है 

हेमराज हंस