सुमरी कै सउंज देखा गइया उतारैं लाग।
सरबार केर पानी दइया उतारैं लाग।।
मोरे रामपुर का खुरचन रसगुल्ला ताला के
मिठास कै बरबरी लइया उतारैं लाग। ।
सथरी मा सोये हें जे कथरी का ओड़ के
वा सुक्ख केर सउंज रजइया उतारैं लाग।।
जेसे सिखिस ही टिमटिमाब लइके अँजोरिय
वा सुरिज केर सउंज तरइया उतारैं लाग।।
माटी कै महक हंस हिबै लोक गीत मा
बम्बइया केर सउंज गबइया उतारैं लाग।।
सब दिनहुं पेड़ माही पत्ता नहीं रहै।
बसंत केर सब दिना सत्ता नहीं रहै।।
कोउ दिन मा चार बेर ओन्हा बदला थै
काहू के देह माही लत्ता नहीं रहै। ।
तास के खेलइया हारा थें जीता थें
हर चाली माही टम्प का पत्ता नहीं रहै। ।
चेरउरी कइ के आपन सम्मान करामैं
सब कोउ उनखे नाई ललत्ता नहीं रहै। ।
महिपर का स्वाद हंस का भरपूर मिला पै
वा पेंड़ के डेगाल मा छत्ता नहीं रहै।।
हेमराज हंस
तुमने गरीबी देखी है भोगी नहीं है।
जाति बाद के मथरे परंगत नहीं परै।
राबन के बहकाये मा अंगद नहीं परै।।
चाह जउन जात के होंय नेता जी
पै गरीबन के साथ उनखर पंगत नहीं परै।।
हेमराज हंस
केबल हबै चुनाव तक, जातिबाद का ढोंग।
जनता ही उनखे निता , चेचर अउर चिपोंग।।
अपने छाती हाथ धर, खुदै करा महसूस।
को ठीहा मा बइठ के, लिहिस न जात से घूंस।।
हेमराज हंस
सूरज नेता बिस्व का, सबका दे उजिआर।
पै उल्लू गरिआ रहें, उनही रात पिआर।।
हेमराज हंस
हाथे माही पकडे माउस।
पूरी दुनिया हमी देखाउस।।
मरिगा बाबा अंधियारे मा
बनाथै नाती पवार हाउस ।।
हेमराज हंस
