बदरी कै हरताल

कहूं कहूं बूड़ा चढा भरे खेत औ ताल। हमरे बिंध मा चल रही बदरी कै हरताल।।

न सामन कै हरिअरी

न सामन कै हरिअरी न नदिअन मा धार। बइठ किसनमा मेंड़ मा गदिआ धरे कपार।।

अम्मा

दादू के सुख संच मा जे मानय आनंद। अम्मा अस कउनौ नहीं दुनिआ का संबंध।।

चीता आबा देस मा

चीता आबा देस मा सीगट भा नाराज।                                                                                                       कहिस कि अब कइसा बनब जंगल का महराज। । 

  सीगट कै ही चाहना रहै जंगली शान।                                                                                                             बन का राजा जब रहै सीगट लोखरी श्वान। ।

जंगल मा साहुत बनी ,सीगट लोखरी केर।
देख  देख  बिदुरा  थै ,बन  का  राजा शेर।।  

bagheli kavita

आयुष्मान का कार्ड धरा है हमरे खीसा मा। पै दबाई से जादा भरोसा हनुमान चालीसा मा।। अस्पताल क हाल न पूछा वहै बेजार ही आज। न बिस्तर न दबा डाकदर कइसा होय इलाज। । महतारी लै रकत कै थइली निगडउरे गभुआर। अमरित परब आजादी मा देखा फोटो सरकार।

दरी से पूंछा थें।

कुर्सी के सबाल उइ दरी से पूंछा थें। गरु गंभीर बात मसखरी से पूंछा थें। । तेल कोल्हू पी गा कि पहार मा चुपरा गा उइ पशु आहार के खरी से पूंछा थें। ।

बाउर पइदा होंय

उइ चाहा थें देस मा बाउर  पइदा होंय। 

औ  हमरे  नेरे  जनाउर  पइदा  होंय।।  

एक  बूंद  पानी  न  बरखै  खेत  मा

अउ धान  नहीं सीधे  चाउर  पइदा होय। ।  

साहित्त फुर कहा थै

साहित्त फुर कहा थै लबरी नही कहै। अपना के सत्ता अस जबरी नही कहै। । साहित्त के नस मा दुष्यंत केर मस है , साहित्त खउटही का कबरी नहीं कहै। । ''राम'' के दरबार तक वाखर धाक ही , पै कबहू अपने मुंह से ''शबरी''नही कहै। । उई घायल से पूंछा थें कि कइसा लगा थै अस्पताल पहुचामै का खबरी नहीं कहै। । रूपियन के निता कबहू कविता नही लिखै हंस काही कोउ दुइ नम्बरी नहीं कहै। । हेमराज हंस --9575287490

जियसटी ही दादू

देस मा भूंख कै बस्ती ही दादू । तऊ रोटी भात मा जियसटी ही दादू ।। महगाई बजिंदा खाये ले थी अमरित पर्ब कै मस्ती ही दादू।।

कबाड़ी लइगा

कोउ मूसर कोउ कांड़ी लइगा। कोउ टठिआ कोउ हांड़ी लइगा ।। आसौ देबारी का जब सफाई भै रसखान औ कबीर का कबाड़ी लइगा।।