का बताई की कहां कहां पिरात है।
बैचैन हबै जिउ मन बूढ़त उतरात है।।
उनखर फरक रही ही सकारे से बायीं आँख
पलकैं लगउतीं लूसी ता काजर सुगात है।।
वाठर बनाउत तक ता उनसे नहीं बनै
लबरी बता रहे हें अमल्लक जनात है ।।
उनखे चिकोटी चींथे कै चिन्हारी बनी ही
अंतस मा उनखे प्रेम का जल प्रप्रात है।।
पाबन पुनीत प्रीत कै पूजा यतर ही हंस
तुलसी के चउरा का दिआ जस टिमटिमात है।।
हेमराज हंस
छोहगइली लये चांदनी, जागी सगली रात।
नदी तीर गोठत रहा, चन्दा रोहणी साथ । ।
प्रेम भरी पोखरी रही, कोउ दिहिस घघोय।
जस बिजली के तार का, जम्फर टूटा होय।।
हेमराज हंस
श्री मैथिली शरण शुक्ल 'मैथिल'
राबन जब से बना है, उनखे दल का ब्रांड।
तब से दुनिया त्रस्त ही, हलकान ब्रम्हाण्ड।।
राबन जब राजा बना, दीन्हिस बनै कानून।
जेखे टेक्स कै जर नहीं, पील्या वाखर खून।।
हेमराज हंस
मैहर जिला
----------------------------------
मइहर जिला शारद नगरी।
जेखर कीरती जग बगरी।।
पहिलय पूजा करै नित आल्हा।
रोज चढ़ाबै फूल औ माला ।।
राम सखा जू का आश्रम पाबन।
ओइला गोलामठ पबरित मन।।
गोपाल बाग औ राम बाग मा।
पहुंचै वहै है जेखे भाग मा ।।
हनुमत कुंज भदन पुर बाले।
हें कैमोर पहार के खाले। ।
श्री सिद्ध बाबा मऊ डोंगरी ।।
मइहर जिला शारद नगरी।
श्रद्धा श्रम संगीत का संगम ।
किहन अगस्तव का स्वागत हम ।।
भै नहीं झुकेही केर समीक्षा।
जहां दिहिन अगस्त विंध्य का दीक्षा।।
बाणासुर का हिअय मनाउरा।
गाँव गाँव मा खेर का चउरा ।।
चउकी चटकउला चपना के।
हनुमत कष्ट हरैं अपना के।।
गाँव करसरा कालका काली।
दुर्गा मइया बछरा बाली ।।
जहाँ भक्ती कै कलश बनै गगरी।
मइहर जिला शारद नगरी। ।
खजुरी ताल का मंदिर भइया।
पोंड़ी धाम मा होय समइया ।।
मुकुंदपुर का इतिहास पुरातन।
जहाँ जगन्नाथ जू स्वयं सनातन।।
हुअय बना है शेर सफारी।
अपने बिंध कै बना चिन्हारी।।
पपरा मा श्री राम दूत हैं ।
रामनगर मा गिद्ध कूट हैं ।।
मार्कण्डेय कै आश्रमधानी।
बाणभट्ट का सुमिरै बानी।।
बाणसागर करै जहाँ पैपखरी।
मइहर जिला शारद नगरी।
हेमराज हंस भेड़ा
