आबा हो लछमी
आबा हो लछमी आबा साथै गनेश के।
स्वागत म देस ठाढ़ है दियना लेस के। ।
मुड़हर से ओसारी तक बड़की सजाये घर का।
स्वस्तिक औ रंगोली से गोदना गोदये फरका। ।
डेहरी सुदिन निकारे तोहरे गृह प्रवेश के।
अाबा हो -लछमी ------------
दुअरा म बँधनबार औ शुभ लाभ भीत म।
गोबर से महकै माटी जस लोक गीत म। ।
अगमानू म अजोर थिरकेँ भेष भेष के।
अाबा हो लछमी ------------
जब से 'भृगु जी 'मारिन श्री हरि का लातें।
तब से दलिद्रता कै अंधियारी कारी रातें। ।
भारत कै सगली माया लई गें विदेश के।
अाबा हो लछमी आबा ----------
गाँवव म अहिरा बाबा का भारी हूंन ही।
होती हैं गऊ कै हत्या सब सार सून ही। ।
मुरइला का छाहुर रोय गा बिन गाय भैस के।
अाबा हो लछ्मी अाबा साथै गनेस के। ।
हेमराज हंस मैहर
कोई टिप्पणी नहीं:
एक टिप्पणी भेजें