मानो मोहनिया घाट

 तुम रहत्या जब साथ ता , पता चलय न बाट। 

औ रस्ता छोह्गर लगै, मानो मोहनिया घाट।। 

हेमराज हंस 

लोकरत्न कक्का

 रीमा  मा  कक्का  हमय ,  जग जीबन  है नाव । 

उनखे  झंडा  के तरी,  सब्द  का  सीतल  छाँव।। 

सब्द का सीतल छाँव मान  सब लेखनी काही। 

चाह  अडारन  होय,  चाह  अनमोल   सिपाही।।

लोकरत्न  कक्का लगैं ,अमल्लक रतन छटीमा। 

आजु हमय सहनाव अस कक्का जी औ रीमा।। 

सरसुती मइय्या होय सहांई। ।

 शाबास बिटिया हार्दिक बधाई। 

सम्मान मिलै खुब बंटय मिठाई।। 

दूनव  कुल  का  नाउ    चलय  

सरसुती मइय्या होय  सहांई। । 

शीर्षक अपना अखबार के।।

 हम  देखइया   दरबार  के। 

शीर्षक अपना अखबार के।। 

गूंजय  देस  भरे मा बानी 

कबिता  के  रस  धार के ।।  

श्री मैथिल जी व्यास

 

रिमही बोली के निता, श्री मैथिल जी व्यास। 

जिनखे कण्ठे मा हबइ शारद जी का बास।।  

हमारी ग्राम गिरा रिमही बघेली के जन कवि आचार्य श्री मैथलीशरण शुक्ल जी को 75 वे जन्म दिन की हार्दिक बधाई। श्री मैथली जी बघेली के मूर्धन्य साहित्यकार हैं। वे बघेली की सौम्यता सुष्मिता सुचिता सरलता सहजता के पहरुआ कवि हैं। उनकी बघेली रचनाओं को मप्र सरकार ने उच्च शिक्षा विभाग के BA. MA. कोर्स में अध्ययन हेतु चयनित कर उनकी मनस्विनी को सम्मानित किया है। हम जैसे तुकबंदी कारो को उनका सनेह अभिभावक की तरह मिल रहा है। माँ शारदा उन्हें स्वथ्य रखें और शतायु होने आशीर्वाद प्रदान करें। कोटि कोटि बधाई। अभिनंदन।

चिटका फोरत चली गय

 चिलचिलात या घाम मा, मिली कहूं न छाह।

चिटका फोरत चली गय, एक पिआसी डाह।।

छठ सातैं की भमरी देखा

  छठ सातैं  की भमरी देखा।

तोहसे  या  न थम्हरी देखा।। 

 

एक  बाल्टी  पानी  खातिर 

उचत  भरे कै जमरी देखा।। 

सउंज  उतार रही तुलसी कै 

या   गंधइली   ममरी   देखा। ।

पसगइयत  मा  परगा पादन

चिलकत चरमुठ चमरी देखा।। 

कांखय लगिहा चुनुन दार मा 

कामड़ेरा  औ  कमरी  देखा।।

हंस अबरदा जब तक वाखर 

रोये   गीध   के  ना  मरी देखा।। 

हेमराज हंस 

--------------------------------

ममरी= तुलसी जैसे दिखने बाली झाड़ी    

पसगइयत=आसपास

 परगा पादन= तिकड़मी  दंदी फन्दी  

 चिलकत=चमकती हुई 

चरमुट= स्वस्थ्य एवं शक्तिवान, शरीर हृष्ट  पुष्ट, 

चुनुन दार = शीघ्र 

अबरदा= आयु 

होइगै सड़क जब तात राम दै ।

 होइगै  सड़क जब तात राम दै । 

जराथें    तरबा    लात   राम दै।। 

 

को   को   ओखे   ऊपर  हींठा 

वा   नहि  पूंछय   जात  राम दै।। 

 

रिन काढ़त  मा  खूब सराहिन 

देत मा टूट गा  भात राम दै। ।  

 

खूब किहिन सोहबत अटकी मा 

अब नहि  पूंछय  बात राम दै । ।  

   

चढ़य मूँड़ घर मा मालकिन का 

जब  कोउ आमय नात राम दै। ।

    

 सचेत रहा  हितुअन से हंस

जे बइठाथें दिन रात राम दै । ।

हेमराज हंस 

जे दसा सुधारय गे रहे, गरीब सुदामा कै।

जे दसा  सुधारय  गे रहे,  गरीब  सुदामा कै। 

उइ तार दइ के आय गें कुरथा पइयामा कै।।

 

अनभल तुकिन ता आपरूभ नस्ट होइगे उइ    

घर  घर मा  पूजा  होथी  बसामान  मामा कै।। 

उइ   कहा  थे  दोस्ती  का   हाथ  बढ़ा  ल्या 

करतूति  नहीं  बिसरय हमीं  पुलबामा  कै।।

 

धइ धइ के ओहटी टोर भांज कइ रहें हें जे 

बांच  बांच  कबिता  इकबाल अल्लामा कै। । 

सीला सपोटी खुब किहिन इतिहासकार हंस

खोजाबर कै पोलपट्टी  खुलगै कारनामा कै।। 

हेमराज हंस    

उइ तखरी मा गूलर का तउल रहे हें।।

 साहुत बनामय खातिर जे कउल रहे हें। 

उइ तखरी  मा गूलर  का  तउल रहे हें।। 

 कान  बहय लागी जो  सुन ल्या हा फुर 

हेन  जात  बाले  जातै  का  पउल रहे हें।। 

आपुस  मां  कइसा माहुर घोराथी इरखा 

भुक्त भोगी आपन  "हरदउल"  रहे  हें।। 

प्रथ्बी औ जयचन्द  कै मुखागर  ही  किसा 

सुन सुन के भारतिन के खून खउल रहे हें।।

 

कल्हव रहें  देस मा उइ आजव हेमैं  'हंस' 

जे बिषइले  उरा बाले डील  डउल रहे हें।।

हेमराज हंस