उइ दल के बड़े बफादार हें , पै प्रत्याशी जात का चाही।

उइ दल के बड़े बफादार हें , पै प्रत्याशी जात का चाही।

टिकस मिलै भाई भतीज का ,या की अपने नात का चाही।।

जे दरबारी भितरघात मा सरासरीहन पकड़े गें तें

तउअव उनही पुरुस्कार अउर बिक्ख सुकरात का चाही।।

हेमराज हंस

मनो रोग के बैद से, कर बाई उपचार ।

 मनो  रोग  के  बैद से, कर  बाई    उपचार । 

उमिर भै अस्सी पार तउ, रोगी हमैं बिचार।। 

कर  बाई   उपचार, दृष्टि मा दोख है दददा।  

चीकन चांदन राह, लगै अपना का खडडा।। 

बलिहारी या समय का कइसा हबय कुजोग। 

जे हमार सम्माननीय ,ग्रस्त हें  मन के रोग। । 

 

जाति बाद मा बंद

राष्ट्रबाद  से  सुरू भा ,जाति बाद मा बंद। 

केत्ते सुर बदलय परें, गामय का एक छंद।।

हेमराज हंस   

 

कउन ही आपन सउंज

भला बताई आप से, कउन ही आपन सउंज। 

अपना बोतल का पियी, हम पी पानी अउंज।। 

              हेमराज हंस   

 

अकही पट्टीदार अस, जे राखाथै लक्ष।

 अकही  पट्टीदार अस,  जे राखाथै  लक्ष। 

राजनीत माही वहै, निकहा आय बिपक्ष।। 

      हेमराज हंस --भेड़ा मइहर  

गदहा का मिसरी नहि पाचय

काल्ह कहिन हमसे बड़कउना। 

काखे  मुंह  मा   तइहा  अउना।। 

गदहा  का  मिसरी  नहि पाचय 

औ  कूकुर का  पचय न  नेउना। ।  

      हेमराज हंस 

  

उइं असीले के आंय पै बाप का पता मिला ।

उइं असीले  के आंय पै बाप का पता मिला । 

खेतन मा सुनय  का   हता तता नहीं मिला ।।

सती कै केहानी मुंह जमानी हयीं कइयव ठे 

पै इतिहास मा कहूं इकठेव सता नहीं मिला ।।  

हेमराज हंस  9575287490 

आंसू के राज कुमार का नाव है रामनरेश।।

पीरा गावय  मा कबव, करय कसर न शेष।

आंसू के राज कुमार हैं, कबिबर रामनरेश।।

जिनखे लेखन मा हबै, शब्दन कै  मरजाद ।

कविता सीधे हिदय से, करै  करुन  संबाद।।

 

पयसुन्नी  अस सब्द का, जे पूजय  दिनरात। 

कबिता उनखे निता ही, जीबन कै जरजात।।   

 

गीत ग़ज़ल कै आरती ,  दोहा कविता छंद।

आंखर आंखर आचमन, अंतस का आनंद।।

 

शब्द  ब्रह्म  का  रुप है,  वर्ण  धरै जब भेष।

मइहर  मा  एक  संत  हैं, पंडित रामनरेश।।

लगय कटाये घाट अस, सब्दन का लालित्य। 

मैहर मा  चमकत रहैं,  राम नरेश आदित्य।। 

कायरता पाखंड से, देस भा जब कमजोर।

 कायरता  पाखंड से, देस भा  जब कमजोर।
तब केरल मा प्रगट भें, शङ्कर सुरिज अजोर।।
आदि शंकराचार्य का , शत  शत नमन हमार।
हम  भारत  बासी  करी ,अपना  कै  जयकार।। 

उनखे दिया मा बाती का पहला नहीं मिला।

उनखे  दिया मा  बाती  का  पहला  नहीं मिला।

नहला  के  ऊपर  मारैं का  दहला  नहीं  मिला।।

जे   लथिरे   हें  खुद    टिहुनी   भर  ब्वादा   मा 

ओऊं   कहा  थें  देखैं   का  चहला  नहीं  मिला।। 

  हेमराज हंस